愛情未到站　雷怡暉

Ads by Google

十二年前訪問九巴創辦人雷亮曾孫女雷怡暉，當時她與陳方安生姪兒陳鴻輝離婚回復單身，要在事業全力衝刺做個揚眉女子。誰知三年後 Roadshow剛上市，雷怡暉未有乘勝追擊，竟然愛情大過天，辭去營運總監及董事之職，跟隨菲律賓華僑未婚夫長駐國內，「我覺得認真，就要放低晒啲嘢去上海。」
可惜這決定未能成就她的愛情，近月雷怡暉忽然回歸社交圈，這個中、澳混血兒美麗如昔，但仍舊單身，她笑咪咪說：「依家冇拍拖。」原來在上海的八年間，她已訂過兩次婚，離離合合，最終孑然一身返港，但性格開朗的她沒有後悔，也不會放棄愛情，「有朋友覺得我嘥咗八年時間，但我有個伴喺上海都好開心吖，我做嘢好少望返轉頭話後悔。雙魚座好浪漫，到六十歲都結婚，唔覺得好甜咩？」

兩度訂婚

回到香港重投社交圈，見到很多朋友都已經離婚，雷怡暉（ Amanda）頗為感慨，「我哋嗰個年代，好多朋友都好想生 BB，但好少聽到話好想結婚、好愛呢個男人，唔係講笑，我呢堆朋友大部分都離咗婚。」
可惜男人都愛偷腥，即使 Amanda放棄一切，跟未婚夫搬到上海，感情也不得善終，「同佢一齊四年，有啲朋友同我講佢好爛滾，但我唔信，一路覺得佢好乖。」那怎會拖了四年也不結婚？「好多人唔係咁戥我高興，叫我睇清楚，細佬（雷永晃）亦好錫我，講好多嘢我知，我老豆（雷普照）又叫我唔使急。」結果？當然是東窗事發，分手收場。

雷怡暉○二年初擔大旗做董事，在股東大會匯報業績。

九九年尾她與拍拖九年的陳鴻輝結婚，婚姻只維持了兩年，「識得太耐，結咗婚都無乜嘢講。」她當年的婚紗，是由設計師好友何志恩（左）設計。

Amanda初到上海，做的是汽車互動廣告公司，因為到台灣人開的天馬高爾夫球會推銷，反被老闆馬生撬到球會當總經理，亦因此締結了她另一段姻緣。 Amanda透過馬老闆，認識了同在上海工作的台灣男友，二人拍拖年多便訂婚，「佢有個九歲囝囝，勁鍾意我，到依家我哋都有 We Chat。」 Amanda不介意做後母，同小朋友去學校見校長，帶他去澳洲旅行，「我好錫佢，當係自己個仔。」只是做足一百分，亦敵不過外間的誘惑，四年感情，又因第三者告終，「俾我發現佢出面有第二個，雖然後來佢買咗戒指話結婚，但我係香港女仔，覺得未結婚，喺蜜月時間都搞到咁，我會冇晒自我。其實我鍾意一個人係完全付出，我做乜都係咁，工作係咁，對男士又係。」
雖然兩度遇人不淑， Amanda沒有因噎廢食，「我會記住好嘅嘢，同佢哋一齊嘅四年都好開心。」回港後追求者不斷，無論是六十或三十幾歲的單身男士她都樂於約會，還鬼馬地說：「只要成年就 OK。」踏入四字頭的她，過了懷孕的黃金時間，已沒有為生 BB急於結婚的壓力，「依家只會為搵個伴侶而結婚，做人最緊要開心，結婚又好，單身又好，有冇仔女都好，要不停有挑戰，人生就有好多唔同嘅門開俾你，但一定要捉緊機會。」

她的弟弟雷永晃（左）早年與上海姑娘 Vivian結婚，育有一子一女。

Amanda在上海八年，操得一口流利普通話。

事業得意

上帝好公平， Amanda的愛情多磨，事業卻是一帆風順。在天馬高爾夫球會工作期間，她結識了個台灣女則師，二人合作開 CEZO活動公司，做網頁、 marketing和 events，主要客戶有平治、勞斯萊斯和寶馬，而當年在九巴、 Roadshow搞演唱會、嘉年華的經驗完全派上用場，「啲客一知我（工作）背景就好信我。」至於她作為九巴後人身份，她就絕口不提，「費事俾人利用番轉頭。」但外形上成個鬼妹樣，難免少了一分說服力，「初時有啲客會問『她是老外，懂不懂？知唔知要做啲乜嘢？』」為了取信客戶， Amanda請專人教普通話，由一句都唔識，學到能流利對答，「初到上海，試過用普通話大大聲問服務員有冇得『打折』，點知講咗『打劫』，全餐廳啲人都喺度笑。」
近年國內打貪，很多客戶的銷售銳減，對 Amanda公司的收入也造成影響，碰巧她與台灣未婚夫分手，離家八年的她亦鳥倦知還，「離開咁耐，想返香港多啲時間陪父母。」

在百度輸入雷怡暉的名字，會彈出湯臣集團鑽石王老五湯珈鋮說喜歡她的新聞， Amanda搞笑話：「好多人都咁同我講，我仲以為係 Amanda S.添，不過當時就嚟訂婚，否則都見吓面。」

昔日的社交紅人，回港後出席社交活動，有些記者卻不認得她，「我反而覺得好自在，以前成日驚記者唔知問乜，依家就真係去見朋友、去享受。」

高峰六十歲

返港後，她沒有順理成章返九巴工作，「爸爸三年前已經退休，加上 Roadshow上晒軌道，我想做啲更有挑戰性嘅嘢。」碰巧有個開公關公司的朋友邀她合作做 partner， Amanda這個 ball場客便變身活動搞手，但香港的公關公司何其多，如何能殺出一條血路？這鬼靈精又有計，「其他公關公司針對時裝、地產，我就鍾意做新嚟香港、有歷史嘅大牌子。」她會主動出擊去 pitch客，好似她想爭取做 Asia Contemporary Art Show，當聽聞負責人去了北京，便主動邀約來港密斟，終成功簽約。我笑她不怕事業得意，情場失意？ Amanda打趣道：「或者就係因為啲男人逼到我做嘢叻，有個睇相佬話我六十歲先係事業最高峰，我諗一定係幫老人家搞 speed dating，哈哈哈！」

她為傅明憲做主席的 SPCA搞攝影展，「被遺棄動物唔一定要好可憐， Venture影到佢哋好可愛，當日已經有三隻狗狗被領養。」

雷怡暉（右一）小時候與家人合照。

雷怡暉加入 Prime公關公司後密密搞活動，包括邀請 Cara G.母女出席 Gusella鞋店開幕。

她的 Pandora晚宴，名模琦琦和陳嘉容都來撐場。